ಕೈಕುಂಜೆ ಮುಖ್ಯರಸ್ತೆ ಅಭಿವೃದ್ಧಿ, ಅಂಗನವಾಡಿ ಕಟ್ಟಡ ಶೀಘ್ರ ನಿರ್ಮಾಣ: ಶಾಸಕರಿಗೆ ಮನವಿ ಸಲ್ಲಿಸಿದ ಸ್ಥಳೀಯರು

ಬಂಟ್ವಾಳ: ಬಂಟ್ವಾಳ ವಿಧಾನಸಭಾ ಕ್ಷೇತ್ರದ ಬಿ.ಸಿ.ರೋಡಿನ  ಕೈಕುಂಜ ನಿವಾಸಿಗಳ ಸಂಘಟನೆಯಾದ, ‘ಶ್ರೀ ದೇವಿ ಫ್ರೆಂಡ್ಸ್ (ರಿ.)’ ಹಾಗೂ ಊರವರು, ಕ್ಷೇತ್ರದ ಪರಿಸರದ ಪ್ರಮುಖ ಮೂಲ ಸಮಸ್ಯೆಗಳ ಪರಿಹಾರಕ್ಕಾಗಿ ಬಂಟ್ವಾಳ ಕ್ಷೇತ್ರದ ಶಾಸಕ ರಾಜೇಶ್ ನಾಯ್ಕ್ ಅವರಿಗೆ ಮನವಿ ಸಲ್ಲಿಸಿದ್ದಾರೆ.

1. ರಸ್ತೆ ದುರಸ್ತಿ: ಅನ್ನಪೂರ್ಣೇಶ್ವರಿ ದೇವಸ್ಥಾನದ ಬಳಿಯಿಂದ  ರೈಲ್ವೆ ನಿಲ್ದಾಣದವರೆಗೆ ಸಾರ್ವಜನಿಕ ಸಂಪರ್ಕ ರಸ್ತೆಯು ಸಂಪೂರ್ಣವಾಗಿ ಹದಗೆಟ್ಟಿದ್ದು, ಪಾದಚಾರಿಗಳಿಗೆ ಹಾಗೂ ವಾಹನ ಸವಾರರಿಗೆ ಸಂಚರಿಸಲು ತೀವ್ರ ತೊಂದರೆಯಾಗುತ್ತಿದೆ. ಆದ್ದರಿಂದ ಕೂಡಲೇ ಈ ರಸ್ತೆಯನ್ನು ದುರಸ್ತಿಪಡಿಸಿ ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಡಬೇಕು.
2. ಹೈ-ಮಾಸ್ಟ್ ದೀಪ ಅಳವಡಿಕೆ: ಕ್ಷೇತ್ರಂಜ ಜಂಕ್ಷನ್‌ನ ಶ್ರೀ ದೇವಿ ಕಟ್ಟೆಯ ಬಳಿ ಸಾರ್ವಜನಿಕರ ಸುರಕ್ಷತೆಯ ಹಿತದೃಷ್ಟಿಯಿಂದ ಈ ಭಾಗದಲ್ಲಿ “ಹೈ-ಮಾಸ್ಟ್” (High-Mast) ದೀಪವನ್ನು ಅಳವಡಿಸಬೇಕು.
3. ಉಬ್ಬು ಹಾಗೂ ಕಾನ್ವೆಕ್ಸ್ ಮಿರರ್ ಅಳವಡಿಕೆ: ನಾಗ ದೇವರ ಸಾನಿಧ್ಯದ ಬಳಿ (ಮೂರು ದಾರಿ ಸಂಧಿಸುವ ಜಾಗ) ಈ ಹಿಂದೆಯೂ ಹಲವಾರು ಬಾರಿ ಅಪಘಾತಗಳು ಸಂಭವಿಸಿವೆ. ಪಾದಚಾರಿಗಳು ಹಾಗೂ ವಾಹನ ಸವಾರರ ಸುರಕ್ಷತೆಗಾಗಿ ಈ ಸ್ಥಳದಲ್ಲಿ ಒಂದು ದರ್ಪಣವನ್ನು (Convex Mirror) ಕೂಡಲೇ ಅಳವಡಿಸಬೇಕು.
4. ಅಂಗನವಾಡಿ ಕಟ್ಟಡ ಶೀಘ್ರ ನಿರ್ಮಾಣ: ಕೈಕುಂಜೆ ಅಂಗನವಾಡಿ ಕಟ್ಟಡ ನಿರ್ಮಾಣ ಅರ್ಧದಲ್ಲೇ ನಿಂತಂತೆ ಕಾಣಿಸುತ್ತಿದ್ದು, ಶೀಘ್ರವಾಗಿ ಇದನ್ನು ಪೂರ್ಣಗೊಳಿಸಬೇಕು

ಸ್ಥಳೀಯ ಸಾರ್ವಜನಿಕರ ಹಿತಾಸಕ್ತಿಯನ್ನು ಗಮನದಲ್ಲಿಟ್ಟುಕೊಂಡು ಈ ಬೇಡಿಕೆಗಳಿಗೆ ಶಾಸಕರು ತುರ್ತಾಗಿ ಸ್ಪಂದಿಸಬೇಕೆಂದು ಶ್ರೀ ದೇವಿ ಫ್ರೆಂಡ್ಸ್ (ರಿ.) ಹಾಗೂ ಊರ ನಾಗರಿಕರು ಮನವಿಯಲ್ಲಿ ವಿನಂತಿಸಿಕೊಂಡಿದ್ದಾರೆ. ಪ್ರಮುಖರಾದ ಶಿವರಾಜ್ (ಬೊಳ್ಳಿ) ಕೈಕುಂಜೆ, ಪ್ರಶಾಂತ್, ಶಶಿಧರ ಕೈಕುಂಜೆ ಮತ್ತಿತರು ಹಾಜರಿದ್ದರು.

ಜಾಹೀರಾತು

ಜಾಹೀರಾತು