ಕಲ್ಲಡ್ಕ ರೈತರ ಸೇವಾ ಸಹಕಾರ ಸಂಘ: ರೂ 572 ಕೋಟಿ ವ್ಯವಹಾರ, ಶೇ. 12ರಷ್ಟು ಡಿವಿಡೆಂಡ್: ಅಧ್ಯಕ್ಷ ಕೆ. ಪದ್ಮನಾಭ ಕೊಟ್ಟಾರಿ

ಬಂಟ್ವಾಳ: ಕಲ್ಲಡ್ಕ ರೈತರ ಸೇವಾ ಸಹಕಾರ ಸಂಘವು 2025–26ನೇ ಸಾಲಿನಲ್ಲಿ ರೂ 572 ಕೋಟಿಗಳ ಬೃಹತ್ ವ್ಯವಹಾರ ನಡೆಸಿ, ರೂ 1,94,77,637.47 ನಿವ್ವಳ ಲಾಭ ಗಳಿಸಿದೆ. ಆಡಿಟ್ ವರ್ಗೀಕರಣದಲ್ಲಿ ಸತತವಾಗಿ ‘ಎ’ ಗ್ರೇಡ್ ಕಾಯ್ದುಕೊಂಡಿರುವ ಸಂಘವು ತನ್ನ ಸದಸ್ಯರಿಗೆ ಶೇ. 12ರಷ್ಟು ಡಿವಿಡೆಂಡ್ ನೀಡಲು ನಿರ್ಧರಿಸಿದೆ ಎಂದು ಸಂಘದ ಅಧ್ಯಕ್ಷ ಕೆ. ಪದ್ಮನಾಭ ಕೊಟ್ಟಾರಿ ಪ್ರಕಟಿಸಿದ್ದಾರೆ.

ಕಲ್ಲಡ್ಕ ಶ್ರೀರಾಮ ಮಂದಿರದ ಮಾಧವ ಸಭಾ ಭವನದಲ್ಲಿ ನಡೆದ ಸಂಘದ ವಾರ್ಷಿಕ ಮಹಾಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡುತ್ತಿದ್ದರು.

12 ವರ್ಷಗಳ ಯಶಸ್ವಿ ಪಯಣ

2014ರ ಏಪ್ರಿಲ್ 2ರಂದು 5 ಗ್ರಾಮಗಳ ಕಾರ್ಯವ್ಯಾಪ್ತಿಯೊಂದಿಗೆ ಆರಂಭಗೊಂಡ ಸಂಘವು 12 ವರ್ಷಗಳ ಸೇವೆಯನ್ನು ಪೂರ್ಣಗೊಳಿಸಿ 13ನೇ ವರ್ಷಕ್ಕೆ ಪಾದಾರ್ಪಣೆ ಮಾಡಿದೆ. ಗೋಳ್ತಮಜಲು, ಅಮ್ಟೂರು, ಬಾಳ್ತಿಲ, ವೀರಕಂಭ ಹಾಗೂ ಬೋಳಂತೂರು ಗ್ರಾಮಗಳಲ್ಲಿ ಸಂಘದ ಕಾರ್ಯವ್ಯಾಪ್ತಿ ಇದ್ದು, ಪ್ರಸ್ತುತ ಕಲ್ಲಡ್ಕ, ವೀರಕಂಭ, ಬೋಳಂತೂರು ಮತ್ತು ಅಮ್ಟೂರುಗಳಲ್ಲಿ ಶಾಖೆಗಳು ಕಾರ್ಯನಿರ್ವಹಿಸುತ್ತಿವೆ. ವರದಿ ವರ್ಷದಲ್ಲಿ 191 ಹೊಸ ಸದಸ್ಯರು ಸೇರ್ಪಡೆಯಾಗಿದ್ದಾರೆ.

ಜಾಹೀರಾತು

ಪ್ರಮುಖ ಆರ್ಥಿಕ ಸಾಧನೆಗಳು & ಸಾಲ ವಿತರಣೆ

ಸಂಘವು ವರದಿ ವರ್ಷದಲ್ಲಿ ಒಟ್ಟು 9,047 ಸದಸ್ಯರಿಗೆರೂ 99.29 ಕೋಟಿ ಸಾಲ ವಿತರಿಸಿದೆ:

• ಮಂಗಳಾ ಕಿಸಾನ್ ಕ್ರೆಡಿಟ್ ಕಾರ್ಡ್: 1,535 ಕೃಷಿಕ ಸದಸ್ಯರಿಗೆ ಶೂನ್ಯ ಬಡ್ಡಿದರದಲ್ಲಿ ರೂ 24.72 ಕೋಟಿ ಸಾಲ.
• ಪಶುಪಾಲನೆ ಹಾಗೂ ಕೃಷಿ ಅಭಿವೃದ್ಧಿ: ಪಶುಗಳ ನಿರ್ವಹಣೆಗೆ 39 ಸದಸ್ಯರಿಗೆ ಶೂನ್ಯ ಬಡ್ಡಿದರದಲ್ಲಿ ರೂ 30 ಲಕ್ಷ ಹಾಗೂ ಕೃಷಿ ಅಭಿವೃದ್ಧಿಗೆ 187 ಸದಸ್ಯರಿಗೆ ಶೇ. 3ರ ಬಡ್ಡಿದರದಲ್ಲಿರೂ 5.87 ಕೋಟಿ ಸಾಲ.
• ಗೃಹ ಹಾಗೂ ಆಭರಣ ಸಾಲ: ಗೃಹ ನಿರ್ಮಾಣಕ್ಕೆ 28 ಸದಸ್ಯರಿಗೆ ₹2.35 ಕೋಟಿ ಮತ್ತು ಆಭರಣ ಈಡಿನ ಮೇಲೆ 5,465 ಸದಸ್ಯರಿಗೆ ರೂ 39 ಕೋಟಿ ಸಾಲ ವಿತರಣೆ.
• ಇತರ ಸಾಲಗಳು: ವಿವಿಧ ಉದ್ದೇಶಗಳಿಗಾಗಿ 1,793 ಸದಸ್ಯರಿಗೆ ರೂ 27 ಕೋಟಿ ಸಾಲ ನೀಡಲಾಗಿದೆ.

ಸೇವಾ ಸೌಲಭ್ಯಗಳು ಮತ್ತು ವಿಮೆ

• ಪಡಿತರ ಹಾಗೂ ಅಡಿಕೆ ಖರೀದಿ: ನ್ಯಾಯಬೆಲೆ ಅಂಗಡಿ ಮೂಲಕ ಆಹಾರ ಧಾನ್ಯ ವಿತರಣೆ ಮಾಡಲಾಗುತ್ತಿದೆ. ಅಡಿಕೆ ಬೆಳೆಗಾರರ ಅನುಕೂಲಕ್ಕಾಗಿ ಕ್ಯಾಂಪ್ಕೊ ಸಹಾಭಾಗಿತ್ವದಲ್ಲಿ ರಜಾ ದಿನ ಹೊರತುಪಡಿಸಿ ಪ್ರತಿದಿನ ಅಡಿಕೆ ಖರೀದಿ ವ್ಯವಸ್ಥೆ ಕಲ್ಪಿಸಲಾಗಿದೆ.
• ಬೆಳೆ ಹಾಗೂ ಯಶಸ್ವಿನಿ ವಿಮೆ: ಹವಾಮಾನ ಆಧಾರಿತ ಬೆಳೆ ವಿಮೆ ಯೋಜನೆಯಡಿ 1,582 ಸದಸ್ಯರಿಗೆ ರೂ 58 ಲಕ್ಷ ಮೊತ್ತವನ್ನು ಸಂಘದ ವತಿಯಿಂದ ಪಾವತಿಸಲಾಗಿದೆ. ಯಶಸ್ವಿನಿ ವಿಮಾ ಯೋಜನೆಯಡಿ 1,059 ಕುಟುಂಬಗಳ 4,090 ಸದಸ್ಯರಿಗೆ ರೂ 4.87 ಲಕ್ಷ ಪಾವತಿಸಿ ನೋಂದಣಿ ಮಾಡಿಸಲಾಗಿದೆ.

ಸಾಮಾಜಿಕ ಹೊಣೆಗಾರಿಕೆ: ಆರೋಗ್ಯ ಮತ್ತು ಶಿಕ್ಷಣಕ್ಕೆ ಬೆಂಬಲ

ಭವಿಷ್ಯದ ಯೋಜನೆಗಳು

• ನೂತನ ಕಟ್ಟಡ ಶಂಕುಸ್ಥಾಪನೆ: ಕಲ್ಲಡ್ಕದಲ್ಲಿ ಸಂಘದ ನೂತನ ಕಟ್ಟಡ ನಿರ್ಮಾಣಕ್ಕಾಗಿ ನವೆಂಬರ್ 18ರಂದು ಶಿಲಾನ್ಯಾಸ ನೆರವೇರಲಿದೆ.
• ವಿಸ್ತರಣೆ: ಅಮ್ಟೂರು ಗ್ರಾಮದಲ್ಲಿನ ಸ್ವಂತ ಜಾಗದಲ್ಲಿ ನೂತನ ಕಟ್ಟಡ ನಿರ್ಮಾಣ ಹಾಗೂ ಬಾಳ್ತಿಲ ಗ್ರಾಮದಲ್ಲಿ ಹೊಸ ಶಾಖೆ ಆರಂಭಿಸಲು ಯೋಜನೆ ರೂಪಿಸಲಾಗಿದೆ.

ಸತತ 12 ವರ್ಷ ಶ್ರೇಷ್ಠ ಸಂಘ ಗೌರವ

ಸಂಘದ ಅತ್ಯುತ್ತಮ ಪ್ರಗತಿಯನ್ನು ಗುರುತಿಸಿ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ (SCDCC) 2015ರಿಂದ ಸತತ 12 ವರ್ಷಗಳ ಕಾಲ ‘ಉತ್ತಮ ಸಹಕಾರ ಸಂಘ’ ಪ್ರಶಸ್ತಿ ಹಾಗೂ ಗೌರವ ಫಲಕ ನೀಡಿ ಪುರಸ್ಕರಿಸಿದೆ ಎಂದು ಪದ್ಮನಾಭ ಕೊಟ್ಟಾರಿ ತಿಳಿಸಿ, ಬೆಂಬಲಿಸಿದ ಎಲ್ಲರಿಗೂ ಧನ್ಯವಾದ ಸಮರ್ಪಿಸಿದರು.

ಸಭೆಯಲ್ಲಿ ಸಂಘದ ಉಪಾಧ್ಯಕ್ಷ ಲೋಕಾನಂದ ಸ್ವಾಗತಿಸಿದರು. ಮುಖ್ಯ ಕಾರ್ಯನಿರ್ವಾಹಣಾಧಿಕಾರಿ ಗೋಪಾಲ ಕೆ. ವರದಿ ವಾಚಿಸಿದರು, ಲೆಕ್ಕಿಗ ನಂದನ್ ರೈ ಆಡಿಟ್ ವರದಿ ಮಂಡಿಸಿದರು.

ನಿರ್ದೇಶಕರುಗಳಾದ ಚಂದ್ರಶೇಖರ ಟೈಲರ್, ಮಹಾಬಲ ಸಾಲ್ಯಾನ್, ಸುರೇಶ್ ಶೆಟ್ಟಿ, ಕೊರಗಪ್ಪ ಗೌಡ, ಪ್ರಭಾಕರ ಶೆಟ್ಟಿ ಬಿ.ಯನ್, ಜಯರಾಮ ರೈ, ಅರುಣಾ ವಿ.ಭಟ್, ವಿಜಯ ಪ್ರಕಾಶ್, ಅಜಿತ್ ಎಂ, ಕೊರಗಪ್ಪ ನಾಯ್ಕ ಹಾಗೂ ನೋಣಯ್ಯ ಎಂ.ಆರ್ ಉಪಸ್ಥಿತರಿದ್ದರು. ನಿರ್ದೇಶಕ ಜಯರಾಮ ರೈ ವಂದಿಸಿದರು. ರಾಜೇಶ್ ಕೊಟ್ಟಾರಿ ಕಾರ್ಯಕ್ರಮ ನಿರೂಪಿಸಿದರು.

ಜಾಹೀರಾತು