ಬಂಟ್ವಾಳ, ಬಿ.ಸಿ.ರೋಡ್: ಕಗ್ಗಂಟಾದ ಪಾರ್ಕಿಂಗ್ ವ್ಯವಸ್ಥೆ

ಬೆಳೆಯುತ್ತಿರುವ ಬಂಟ್ವಾಳ ಪುರಸಭಾ ವ್ಯಾಪ್ತಿಯ ಪ್ರಮುಖ ಪೇಟೆಗಳಾದ ಬಂಟ್ವಾಳ, ಬಿ.ಸಿ.ರೋಡ್ ನಲ್ಲಿ ಪಾರ್ಕಿಂಗ್ ಸಮಸ್ಯೆ ಕಗ್ಗಂಟಾಗಿ ಪರಿಣಮಿಸಿದೆ. ವಾಹನಗಳಲ್ಲಿ ಕೆಲಸ ಕಾರ್ಯಗಳಿಗೆಂದು ಈ ಪೇಟೆಗಳಿಗೆ ಬರುವವರು ಪಾರ್ಕಿಂಗ್ ಎಲ್ಲಿ ಮಾಡಲಿ ಎಂದು ತಲೆಕೆಡಿಸಿಕೊಳ್ಳುತ್ತಾರೆ. ಆಸ್ಪತ್ರೆ, ಕಚೇರಿ, ಬ್ಯಾಂಕು, ಅಂಗಡಿ ಮಳಿಗೆಗಳಿಗೆ ಆಗಮಿಸುವವರು ಸಮಸ್ಯೆ ಅನುಭವಿಸುತ್ತಾರೆ.

https://www.opticworld.net/

ಹೀಗಾಗಿ ಬಂಟ್ವಾಳ ಪುರಸಭೆಯ ಅತಿದೊಡ್ಡ ಸಮಸ್ಯೆಗಳ ಪಟ್ಟಿಗಳಲ್ಲಿ ಪಾರ್ಕಿಂಗ್ ವ್ಯವಸ್ಥೆ ಜಾಗ ಪಡೆದುಕೊಂಡಿದೆ. 2016 ನವೆಂಬರ್ ನಲ್ಲಿ ಪ್ರೊಬೆಷನರಿ ಐಎಎಸ್ ಗಾರ್ಗಿ ಜೈನ್ ಮುಖ್ಯಾಧಿಕಾರಿಯಾಗಿದ್ದ ವೇಳೆ ಸಭೆಗಳಲ್ಲಿ ಇಡೀ ಬಿ.ಸಿ.ರೋಡ್, ಬಂಟ್ವಾಳಕ್ಕೆ ಪಾರ್ಕಿಂಗ್ ಸಹಿತ ಆಡಳಿತಾತ್ಮಕ ಶಿಸ್ತು ತರುವ ಹಾಗೂ ಪಟ್ಟಣಕ್ಕೊಂದು ವ್ಯವಸ್ಥಿತ ಚೌಕಟ್ಟು ತರುವ ಕುರಿತು ಚರ್ಚೆಗಳಾಗಿತ್ತು. ಅದಾಗಿ ಒಂಭತ್ತು ವರ್ಷಗಳಾದರೂ ಪರಿಹಾರ ದೊರಕಿಲ್ಲ.

ಸಮಸ್ಯೆಗಳ ಸರಮಾಲೆ:

ಬಿ.ಸಿ.ರೋಡ್ ಸಹಿತ ಬಂಟ್ವಾಳ ಪುರಸಭೆಯ ಸರಕಾರಿ ಕಟ್ಟಡಗಳ ಹಾಗೂ ಖಾಸಗಿ ಕಾಂಪ್ಲೆಕ್ಸ್ ಗಳ ತಳ ಅಂತಸ್ತಿನಲ್ಲಿ  ಪಾರ್ಕಿಂಗ್ ಜಾಗವಿರುತ್ತಿದ್ದರೆ ಅರ್ಧದಷ್ಟು ಸಮಸ್ಯೆ ಪರಿಹಾರವಾಗುತ್ತಿತ್ತು. ಕೆಎಸ್ಸಾರ್ಟಿಸಿ ಸಹಿತ ಹಲವು ಕಟ್ಟಡಗಳಲ್ಲಿ ಪಾರ್ಕಿಂಗ್ ಸೌಲಭ್ಯ ಇದ್ದರೂ ಅದನ್ನು ಸದ್ಬಳಕೆ ಮಾಡುವತ್ತ ಆಡಳಿತ ಯೋಜನೆ ರೂಪಿಸಿಲ್ಲ. ಹೊಸತಾಗಿ ನಿರ್ಮಿಸಲಾದ ಬಹುಮಹಡಿ ಕಟ್ಟಡಗಳ ಎದುರು ವಾಹನ ನಿಲ್ಲುವುದಷ್ಟೇ ಅಲ್ಲ, ರಾಷ್ಟ್ರೀಯ ಹೆದ್ದಾರಿಯಲ್ಲೇ ವಾಹನಗಳು ನಿಲ್ಲುತ್ತಿರುವುದು ಕೆಲವೊಮ್ಮೆ ವಾಹನದಟ್ಟಣೆಗೂ ಕಾರಣವಾಗುತ್ತಿದೆ.  ಬಿ.ಸಿ.ರೋಡಿನ ಫ್ಲೈಓವರ್ ಕೆಳಗೆ ದ್ವಿಚಕ್ರ ವಾಹನಗಳು ಹಾಗೂ ಟ್ಯಾಕ್ಸಿ, ಆಟೊಗಳು ನಿಲ್ಲುತ್ತಿವೆ. ಬಿ.ಸಿ.ರೋಡಿನ ಕೈಕುಂಜಕ್ಕೆ ತೆರಳುವ ಮಾರ್ಗ (ಈಗ ಮೆಸ್ಕಾಂ ವಿಭಾಗೀಯ ಕಚೇರಿ ಇರುವ ಜಾಗ)ದಲ್ಲಿ ವ್ಯವಸ್ಥಿತವಾದ ಪಾರ್ಕಿಂಗ್ ನಿರ್ಮಿಸುವ ಸಾಧ್ಯತೆ ಕುರಿತು ತಜ್ಞರ ಸರ್ವೇಯನ್ನು 2016ರಲ್ಲೇ ನಡೆಸಲಾಗಿತ್ತು. ಅದು ಕಾರ್ಯರೂಪಕ್ಕೆ ಬಂದಿಲ್ಲ. ಸದ್ಯಕ್ಕೆ ಪೊಲೀಸ್ ಸ್ಟೇಶನ್ ಗೆ ಹೋಗುವ ದಾರಿ, ತಾಲೂಕು ಪಂಚಾಯಿತಿ ಬಳಿ ಹಾಗೂ ಜಾಗ ಸಿಕ್ಕಲ್ಲೆಲ್ಲಾ ಪಾರ್ಕಿಂಗ್ ಮಾಡಲಾಗುತ್ತಿದೆ. ಬಹುತೇಕ ಅಂಗಡಿ ಮಾಲೀಕರೇ ನೋ ಪಾರ್ಕಿಂಗ್ ಬೋರ್ಡು ತಗಲಿಸಿದ್ದು, ಅಲ್ಲೂ ದ್ವಿಚಕ್ರ ವಾಹನ ನಿಲ್ಲಿಸುತ್ತಿದ್ದಾರೆ.

ಬಂಟ್ವಾಳ ತಾಲೂಕು ಪಂಚಾಯಿತಿ ಎದುರು ಶಾಸಕರ ಕಚೇರಿ ಹಾಗೂ ಇನ್ನಿತರ ಕೆಲಸ ಕಾರ್ಯಗಳಿಗೆ ಬರುವವರು ವಾಹನಗಳನ್ನು ನಿಲ್ಲಿಸಲೂ ಜಾಗವಿಲ್ಲ. ಅಲ್ಲಿ ತಡೆಬೇಲಿ ಹಾಕಲಾಗಿದ್ದು, ಶಾಸಕರು ಸೂಚನೆ ನೀಡಿದ ಬಳಿಕವೂ ತೆರವು ಕಾರ್ಯ ನಡೆದಿಲ್ಲ. ಕೃಷಿ, ತೋಟಗಾರಿಕೆ, ಸಿಡಿಪಿಒ, ಕನ್ನಡ ಭವನ, ಸರ್ವೇ, ಸಬ್ ರಿಜಿಸ್ಟ್ರಾರ್ ಕಚೇರಿಗಳಿಗೆ ಬರುವವರು ವಾಹನಗಳನ್ನು ನಿಲ್ಲಿಸಲು ಪರದಾಡಬೇಕಾಗುತ್ತದೆ. ಹೀಗಾಗಿ ಎಲ್ಲಿ ಜಾಗ ಸಿಗುತ್ತದೆಯೋ ಅಲ್ಲಿ ವಾಹನಗಳನ್ನು ಅನಿವಾರ್ಯವಾಗಿ ನಿಲ್ಲಿಸಲಾಗುತ್ತಿದೆ.

ಖಾಲಿ ಜಾಗ ಸದ್ಬಳಕೆ ಮಾಡಿರಿ: ಇಚ್ಛಾಶಕ್ತಿ ಇದ್ದರೆ, ಪಾರ್ಕಿಂಗ್ ಮಾಡಲು ಜಾಗ ಬೇಕಾದಷ್ಟು ಗುರುತಿಸಬಹುದು. ಪೊಲೀಸ್ ಠಾಣೆಗೆ ತೆರಳುವ ಮಾರ್ಗದ ಪಕ್ಕದಲ್ಲೇ ಇರುವ ತಾಪಂ ಕಟ್ಟಡದ ಬಳಿ ಹಲವು ವಾಹನಗಳನ್ನು ವ್ಯವಸ್ಥಿತವಾಗಿ ನಿಲ್ಲಿಸಬಹುದು. ಹಿಂದೆ ಬಿಡಿಒ ಕಚೇರಿ ಇದ್ದ ಜಾಗದಲ್ಲಿ ಪಾರ್ಕಿಂಗ್ ಮಾಡಲು ಅವಕಾಶವಿದೆ. ಸಬ್ ರಿಜಿಸ್ಟ್ರಾರ್ ಹಿಂದೆ ಕಾರ್ಯಾಚರಿಸುತ್ತಿದ್ದ ಜಾಗವನ್ನು ಮಲ್ಟಿಲೆವೆಲ್ ಪಾರ್ಕಿಂಗ್ ಮಾಡಬಹುದು. ಕೈಕುಂಜಕ್ಕೆ ತೆರಳುವ ಮಾರ್ಗದ ಎಡ, ಬಲಗಳೆಲ್ಲವೂ ಸರಕಾರಿ ಜಾಗಗಳು. ಇವನ್ನು ಪೇ ಪಾರ್ಕಿಂಗ್ ಗೆ ಬಳಸಬಹುದು. ಹೀಗಾದಾಗ ವಾಹನ ನಿಲುಗಡೆಗೊಂದು ಶಿಸ್ತು ದೊರಕುತ್ತದೆ. ಆದರೆ ಇದನ್ನು ಮಾಡಲು ಆಡಳಿತಕ್ಕೆ ಇಚ್ಛಾಶಕ್ತಿ ಬೇಕು.