ಕುಡಿಯುವ ನೀರು ಸರಬರಾಜು ಯೋಜನೆಯನ್ವಯ ಪೈಪ್ ಲೈನ್ ಗಾಗಿ ಅಗೆದು ಮುಚ್ಚದೇ ಇರುವ ಕಾರಣ ಓಡಾಟಕ್ಕೆ ತೊಂದರೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಸ್ಥಳೀಯರೇ ಶ್ರಮದಾನದ ಮೂಲಕ ಕಲ್ಲು ಮಣ್ಣು ಹಾಕಿ ಮುಚ್ಚಿದ್ದಾರೆ.
ಬಿ.ಸಿ.ರೋಡ್ ಬಸ್ ನಿಲ್ದಾಣದ ಹಿಂಬದಿ ರಸ್ತೆಯಲ್ಲಿ ಈ ಸಮಸ್ಯೆ ಎದುರಾಗಿದ್ದು, ಸ್ಥಳೀಯರು ಓಡಾಡಲು ತೊಂದರೆಪಡುತ್ತಿದ್ದರು. ಈ ಹಿನ್ನೆಲೆಯಲ್ಲಿ ನಿವಾಸಿಗಳಾದ ಸಂಜಯ ಮಲ್ಯ, ಎಂ.ಸುಬ್ರಹ್ಮಣ್ಯ ಪೈ, ಇ.ಧನುಕರ ರೈ, ಶಿವಾನಂದದ ಶೆಣೈ, ಮಹಮ್ಮದ್ ಶ್ರಮದಾನದ ಮೂಲಕ ಈ ಕಾರ್ಯ ನೆರವೇರಿಸಿದರು. ಬಿ.ಸಿ.ರೋಡಿನ ಹೃದಯ ಭಾಗದಲ್ಲಿದ್ದರೂ ಡಾಂಬರು ಕಾಣ ಈ ರಸ್ತೆ ಆರು ವರ್ಷಗಳಿಂದ ಹದಗೆಟ್ಟ ಸ್ಥಿತಿಯಲ್ಲೇ ಇದೆ. ಇದೀಗ ಪೈಪ್ ಲೈನ್ ಕಾಮಗಾರಿ ಸಮಸ್ಯೆಯಿಂದ ಮತ್ತಷ್ಟು ತೊಂದರೆ ಅನುಭವಿಸುವಂತಾಗಿದ್ದು, ತಾತ್ಕಾಲಿಕವಾಗಿ ರಸ್ತೆಯಲ್ಲಿ ಸುಗಮ ಸಂಚಾರಕ್ಕೆ ಅನುವು ಮಾಡಲು ಈ ಕ್ರಮ ಕೈಗೊಂಡಿದ್ದೇವೆ ಎಂದು ಅವರು ತಿಳಿಸಿದರು.