ಸೇವಾಕಾರ್ಯ ನಡೆಯುವಲ್ಲಿ ಭಗವಂತನಿರುತ್ತಾನೆ. ಅನ್ನದಾನ ಶ್ರೇಷ್ಠದಾನವಾಗಿದ್ದು ದೇವರ ಸ್ವರೂಪಿಗಳಾದ ಮಕ್ಕಳಿಗೆ ಬೆಳಗ್ಗಿನ ಉಪಾಹಾರ ಕೊಡುವ ವ್ಯವಸ್ಥೆಯನ್ನು ಸತ್ಯಸಾಯಿ ಭಕ್ತರ ಮೂಲಕ ಮಾಡುತ್ತಿರುವುದು ನಿಜವಾದ ದೇವರ ಸೇವೆ ಎಂದು ಸತ್ಯಸಾಯಿ ಸೇವಾ ಸಮಿತಿ ಮಾಜಿ ಸಂಚಾಲಕ ಪ್ರೊ. ಜತ್ತನಕೋಡಿ ಸುಂದರ ಭಟ್ ಹೇಳಿದರು.
ಕಡೇಶ್ವಾಲ್ಯ ದ.ಕ.ಜಿ.ಪ.ಹಿ ಪ್ರಾಥಮಿಕ ಶಾಲೆ ಮತ್ತು ಶ್ರೀ ಸತ್ಯಸಾಯಿ ಅನ್ನಪೂರ್ಣ ಸೇವಾ ಟ್ರಸ್ಟ್ ಮುದ್ದೇನಹಳ್ಳಿ ಇವರ ಆಶ್ರಯದಲ್ಲಿ ನೀಡುತ್ತಿರುವ ಬೆಳಗ್ಗಿನ ಉಪಾಹಾರ ಯೋಜನೆಯನ್ನು ಉದ್ಘಾಟಿಸಿ ಮಾತನಾಡಿದರು.
ಶಿಕ್ಷಣ ಸಂಪನ್ಮೂಲ ವ್ಯಕ್ತಿ ನಾರಾಯಣ ಗೌಡ ಪ್ರಾಸ್ತಾವಿಕ ಮಾತನಾಡಿ ಸತ್ಯಸಾಯಿ ಬಾಬ ಅವರ ಆಶಯದಂತೆ ಸೇವೆ ಮತ್ತು ತ್ಯಾಗ ಮನೋಭಾವವನ್ನು *ಬೆಳೆಸಿಕೊಳ್ಳಬೇಕು ಎಂಬ ಉದ್ದೇಶದಿಂದ ಸತ್ಯಸಾಯಿ ವಿದ್ಯಾಸಂಸ್ಥೆಯ ಹಿರಿಯ ವಿದ್ಯಾರ್ಥಿಗಳು ಅನ್ನಪೂರ್ಣಸೇವಾ ಟ್ರಸ್ಟ್ನ ಮೂಲಕ ಬೆಳಗ್ಗಿನ ಉಪಾಹಾರದ ವ್ಯವಸ್ಥೆಯನ್ನು ರಾಜ್ಯಾದ್ಯಂತ ಕೆಲವು ಜಿಲ್ಲೆಗಳಲ್ಲಿ ಮಾಡುತ್ತಿದ್ದಾರೆ. ನಮ್ಮ ಬೇಡಿಕೆಯಂತೆ ಬಂಟ್ವಾಳ ತಾಲೂಕಿನ ಆಯ್ದ ಕೆಲವು ಶಾಲೆಗಳಿಗೆ ಪೌಷ್ಠಿಕ ಆಹಾರದ ಕೊರತೆಯನ್ನು ನೀಗಿಸಿ ಶೈಕ್ಷಣಿಕ ಗುಣ ಮಟ್ಟವನ್ನು ಹೆಚ್ಚಿಸುವ ಉದ್ದೇಶದಿಂದ ಉಪಾಹಾರದ ವ್ಯವಸ್ಥೆ ಮಾಡಿಕೊಡಲಾಗುತ್ತಿದೆ ಎಂದರು .
ಕಡೇಶ್ವಾಲ್ಯ ಗ್ರಾಮ ಪಂಚಾಯತ್ ಅಧ್ಯಕ್ಷೆ ಶ್ಯಾಮಲ ಶೆಟ್ಟಿ ಅಧ್ಯಕ್ಷತೆ ವಹಿಸಿದ್ದರು. ಉಪಾಹಾರ ಯೋಜನೆಗೆ ಎಲ್ಲಾ ಪೋಷಕರ ಪ್ರೋತ್ಸಾಹ ಸಹಕಾರ ಅಗತ್ಯವಾಗಿದ್ದು ಯೋಜನೆ ಯಶಸ್ವಿಯಾಗಲಿ ಎಂದು ಶುಭ ಹಾರೈಸಿದರು.
ವೇದಿಕೆಯಲ್ಲಿ ಸತ್ಯಸಾಯಿ ಸಮಿತಿ ಮಾಜಿ ಸಂಚಾಲಕ ತಿರುಮಲೇಶ್ವರ ಭಟ್, ವ್ಯವಸಾಯ ಸೇವಾ ಸಹಕಾರಿ ಸಂಘದ ಅಧ್ಯಕ್ಷ ವಿದ್ಯಾಧರ ರೈ, , ಶಿಕ್ಷಣ ಸಂಯೋಜಕಿ ಪುಷ್ಪ, ಶಾಲಾಭವೃದ್ದಿ ಸಮಿತಿ ಅಧ್ಯಕ್ಷ ರಾಮಕೃಷ್ಣ ರಾವ್ ನೆಕ್ಕಿಲಾಡಿ, ಪ್ರೌಢ ಶಾಲಾ ಮುಖ್ಯೋಪಾಧ್ಯಾಯ ಸತೀಶ್ ಭಟ್, ಗ್ರಾ.ಪಂ ಉಪಾಧ್ಯಕ್ಷ ಸುರೇಂದ್ರ ರಾವ್ ನೆಕ್ಕಿಲಾಡಿ ಮೊದಲಾದವರು ಉಪಸ್ಥಿತರಿದ್ದರು.
ಶಾಲಾ ಮುಖ್ಯೋಪಾಧ್ಯಾಯಿನಿ ಉಮಾವತಿ ಎನ್. ಸ್ವಾಗತಿಸಿ ಶಿಕ್ಷಕ ಶಿವರಾಮ ಭಟ್ ನಿರೂಪಿಸಿದರು.ಶಿಕ್ಷಕಿ ಭವಾನಿ ಗಿರಿಯಪ್ಪ ಗೌಡ ವಂದಿಸಿದರು.
Be the first to comment on "ಮಕ್ಕಳಿಗೆ ಬೆಳಗ್ಗಿನ ಉಪಾಹಾರ ನೀಡುವುದು ದೇವರ ಸೇವೆ"