ಬ್ರಹ್ಮರಕೂಟ್ಲು ಟೋಲ್ ತೆರವಿಗೆ ಒತ್ತಾಯಿಸಿ 17ರಂದು ಹಗಲು ರಾತ್ರಿ ಧರಣಿ: ರಮಾನಾಥ ರೈ – Details

ಬಂಟ್ವಾಳ: ನಿಯಮಬಾಹಿರವಾಗಿ ಕಾರ್ಯಾಚರಿಸುತ್ತಿರುವ ಬ್ರಹ್ಮರಕೂಟ್ಲು ಟೋಲ್ ಗೇಟ್ ತೆರವಿನ ಕುರಿತು ಹಲವು ಹೇಳಿಕೆಗಳು ಬರುತ್ತಿದ್ದರೂ ಅಧಿಕೃತವಾಗಿ ಇನ್ನೂ ಯಾರೂ ಯಾವಾಗ ತೆರವಾಗುತ್ತದೆ ಎಂದು ಘೋಷಿಸಿಲ್ಲ. ಅಲ್ಲದೆ, ಅದರ ನವೀಕರಣ ಕೆಲಸ ಕಾರ್ಯಗಳೂ ನಡೆಯುತ್ತಿರುವುದು ಕಾಣಿಸುತ್ತಿದ್ದು, ಈ ಹಿನ್ನೆಲೆಯಲ್ಲಿ ಸಮಾನ ಮನಸ್ಕ ಸಂಘಟನೆಗಳ ಸಹಭಾಗಿತ್ವದಲ್ಲಿ ರಾಜಕೀಯರಹಿತವಾಗಿ 24 ತಾಸುಗಳ ಹಗಲು ರಾತ್ರಿ ಧರಣಿ ನವೆಂಬರ್ 17ರ ಬೆಳಗ್ಗೆ 9.30ರಿಂದ 18ರ ಬೆಳಗ್ಗೆ 9.30ರವರೆಗೆ ನಡೆಯಲಿದೆ.

ಟೋಲ್ ಗೇಟ್ ತೆರವು ಹೋರಾಟ ಸಮಿತಿಯ ಗೌರವಾಧ್ಯಕ್ಷರೂ ಆಗಿರುವ ಮಾಜಿ ಸಚಿವ ಬಿ.ರಮಾನಾಥ ರೈ ಶುಕ್ರವಾರ ಸಂಜೆ ಬಂಟ್ವಾಳ ಪ್ರೆಸ್ ಕ್ಲಬ್ ನಲ್ಲಿ ಕರೆದ ಸುದ್ದಿಗೋಷ್ಠಿಯಲ್ಲಿ ಈ ಮಾಹಿತಿ ನೀಡಿದ್ದಾರೆ. ಜಿಲ್ಲೆಯ ಹೆದ್ದಾರಿಗಳಲ್ಲಿ ಬೇಕಾಬಿಟ್ಟಿ ಟೋಲ್ ಗೇಟ್ ಗಳನ್ನು ತೆರೆಯಬಾರದು. ಅಂತರದ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲನೆ ಮಾಡಬೇಕು ಎಂಬ ಬೇಡಿಕೆಯನ್ನು ಮಂಡಿಸಲಾಗಿದೆ. ಟೋಲ್ ಅವಧಿ ಮುಗಿದರೂ ಅದು ಮುಂದುವರಿಯುತ್ತಿರುವುದು ಕಂಡುಬಂದಿದ್ದು, ಯಾರೊಬ್ಬ ಸಾರ್ವಜನಿಕರೂ ಅದು ಮುಂದುವರಿಯಬೇಕು ಎಂದು ಹೇಳುತ್ತಿಲ್ಲ. ಯಾರಿಗೂ ಬೇಡವಾದ ಟೋಲ್ ತೆರವುಗೊಳಿಸುವುದೇ ಸೂಕ್ತ ಎಂದು ರೈ ಹೇಳಿದರು.

ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಹೆದ್ದಾರಿ ಕಾಮಗಾರಿ ನಡೆಯುವ ವೇಳೆ ಹಲವು ಸಮಸ್ಯೆಗಳು ಉಂಟಾಗಿದ್ದು ಅವುಗಳನ್ನೆಲ್ಲಾ ಜನರು ಸಹಿಸಿಕೊಂಡಿದ್ದಾರೆ, ಇನ್ನು ಟೋಲ್ ಕಟ್ಟುವುದೂ ದುಬಾರಿಯಾಗುತ್ತಿದ್ದು ಅತ್ಯಂತ ಅವೈಜ್ಞಾನಿಕವೂ ಆಗಿದೆ ಎಂದು ಹೇಳಿದ ಅವರು ಈಗಾಗಲೇ ಎರಡು ಹೋರಾಟಗಳು ಯಶಸ್ವಿಯಾಗಿದ್ದು, ಮುಂದಿನ ಭಾಗವಾಗಿ ಟೋಲ್ ಮುಚ್ಚುವವರೆಗೂ ಹೋರಾಟ ಮುಂದುವರಿಯಲಿದೆ ಎಂದರು.

ಸಮಿತಿಯ ಸಂಚಾಲಕ ಬಿ.ಶೇಖರ್ ಮಾತನಾಡಿ, ನಾವು ಪ್ರಚಾರಕ್ಕೋಸ್ಕರ ಹೋರಾಟವನ್ನು ಮಾಡುತ್ತಿಲ್ಲ. ಟೋಲ್ ಮುಚ್ಚಲಾಗುವುದು ಎಂಬ ಮಾತುಗಳು ಬಂದಿವೆಯೇ ಹೊರತು, ಯಾವಾಗ ಮುಚ್ಚಲಾಗುತ್ತದೆ ಎಂಬ ನಿರ್ದಿಷ್ಟ ದಿನಾಂಕವನ್ನಾಗಲೀ ಗಡುವನ್ನಾಗಲೀ ನೀಡಿಲ್ಲ. ಪ್ರಾಧಿಕಾರವಾಗಲಿ ಅಥವಾ ಸಂಬಂಧಪಟ್ಟವರಾಗಲೀ ಟೋಲ್ ಕುರಿತು ಸ್ಪಷ್ಟ ವಿಚಾರವನ್ನು ಒದಗಿಸಬೇಕು ಎಂದರು.

ಸುದ್ದಿಗೋಷ್ಠಿಯಲ್ಲಿ ಬುಡಾ ಮಾಜಿ ಅಧ್ಯಕ್ಷ ಸದಾಶಿವ ಬಂಗೇರ, ಸಮಾನ ಮನಸ್ಕ ಸಂಘಟನೆಗಳ ಸಮನ್ವಯ ಸಮಿತಿ ಅಧ್ಯಕ್ಷರಾದ ಮೋಹನ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಸುರೇಶ್ ಕುಮಾರ್ ಮತ್ತಿತರರು ಉಪಸ್ಥಿತರಿದ್ದರು.