ಬಂಟ್ವಾಳ ತಾಲೂಕಿನಲ್ಲಿ ಮುಂದುವರಿದ ಮಳೆಹಾನಿ, ಕುಸಿದ ಸರ್ಕಾರಿ ಶಾಲಾ ಕಂಪೌಂಡ್, ಹಲವು ಮನೆಗಳಿಗೂ ಹಾನಿ

ಬಂಟ್ವಾಳ: ಸೋಮವಾರ ಸುರಿದ ಭಾರಿ ಮಳೆಗೆ ಬಂಟ್ವಾಳ ತಾಲೂಕಿನ ಪಾಣೆಮಂಗಳೂರು ಸಮೀಪ ಬೋಳಂಗಡಿಯ ದ.ಕ.ಜಿಲ್ಲಾ ಪಂಚಾಯಿತಿ ಹಿರಿಯ ಪ್ರಾಥಮಿಕ ಶಾಲೆಯ ಕಂಪೌಂಡ್ ಕುಸಿದಿದೆ.

ಸಜಿಪನಡು ಗ್ರಾಮದ ಕೋಣೆಮಾರು ಎಂಬಲ್ಲಿ ಗುಡ್ಡ ಕುಸಿಯುವ ಸಂಭವ ಇದ್ದು, ಪಕ್ಕದ ಮನೆಗಳಿಗೆ ತಿಳುವಳಿಕೆ ನೀಡಲಾಗಿದೆ.  ಬಾಳೆಪುಣಿ ಗ್ರಾಮದ ಕೆಳಗಿನ ನಾರ್ಯದಲ್ಲಿ ಶೀನ ಶೆಟ್ಟಿ ಎಂಬವರ ದನದ ಕೊಟ್ಟಿಗೆಗೆ ಮರ ಬಿದ್ದು ಹಾನಿಯಾಗಿದೆ. ಮೇರಮಜಲಿನ ಫ್ರಾನ್ಸಿಸ್ ಲಸ್ರಾಡೊ ಅವರ ಕಂಪೌಂಡ್ ಕುಸಿದಿದೆ. ಪುದು ಗ್ರಾಮದ ರಫೀಕ್  ಮನೆಗೆ ಹಾನಿಯಾಗಿದೆ. ಬೋಳಂಗಡಿ ಶಾಲೆಯ ದ.ಕ.ಜಿಪಂ ಹಿರಿಯ ಪ್ರಾಥಮಿಕ ಶಾಲೆಯ ಕಂಪೌಂಡ್ ಕುಸಿದಿದೆ. ಬಂಟ್ವಾಳ ಮೂಡ ಗ್ರಾಂದ ಗಣೇಶ್ ಮತ್ತು ಶಶಿ ಎಂಬವರ ಮನೆಗಳ ಮಧ್ಯೆ ಗುಡ್ಡದ ಮಣ್ಣು ಜರಿದಿದೆ. ನರಿಕೊಂಬು ಗ್ರಾಮದ ಕುರ್ಚಿಪಳ್ಳ ಎಂಬಲ್ಲಿ ಸುನೀತಾ ಪದ್ಮನಾಭ ಅವರ ಶಾಮಿಯಾನದ ಅಂಗಡಿಯ ಗೋಡೆ ಕುಸಿದಿದೆ. ಬಂಟ್ವಾಳ ತಾಲೂಕು ಬಿ.ಮೂಡ ಗ್ರಾಮದ ಭಂಡಾರಿಬೆಟ್ಟು ಎಂಬಲ್ಲಿ ರಾಜ್ಯ ಹೆದ್ದಾರಿ ಬದಿ ಗುಡ್ಡ ಜರಿದಿದೆ. ಇಡ್ಕಿದು ಗ್ರಾಮದ ಏಮಾಜೆ ಮನೆ ಎಂಬಲ್ಲಿ ಶಿವರಾಮ ನಾಯ್ಕ ಅವರ ವಾಸದ ಮನೆ ಗಾಳಿ ಮಳೆಗೆ ಹಾನಿಯಾಗಿದೆ.