ಬಂಟ್ವಾಳ: ಗುರುವಾರ ರಾತ್ರಿಯಿಂದೀಚೆಗೆ ಸುರಿದ ಭಾರಿ ಮಳೆಗೆ ಬಂಟ್ವಾಳ ತಾಲೂಕಿನ ಹಲವೆಡೆ ಹಾನಿ ಸಂಭವಿಸಿದೆ. ಕೆಲವೆಡೆ ಮಣ್ಣು ಕುಸಿದರೆ, ರಸ್ತೆ ಬದಿಯಲ್ಲಿದ್ದ ವಿದ್ಯುತ್ ಕಂಬಗಳು ಉರುಳಿವೆ. ಇನ್ನು ರಾಷ್ಟ್ರೀಯ ಹೆದ್ದಾರಿಯ ಗುಂಡಿಗಳು ತುಂಬಿ ವಾಹನ ಸವಾರರು ಪರದಾಟ ಅನುಭವಿಸುವ ಸ್ಥಿತಿಯೂ ನಿರ್ಮಾಣವಾಯಿತು.
ಸಜೀಪನಡು ಗ್ರಾಮದ ಬೊಳಿಮೆ ಎಂಬಲ್ಲಿ ಉಮಾವತಿ ಎಂಬವರ ಮನೆ ಪೂರ್ಣ ಹಾನಿಯಾಗಿದ್ದರೆ, ಬಾಳೆಪುಣಿ ಗ್ರಾಮದ ಕಣಂತೂರು ಎಂಬಲ್ಲಿ ಗುಡ್ಡ ಜರಿದು ನೆರೆನೀರು ತೋಟಕ್ಕೆ ನುಗ್ಗಿದೆ.
ನರಿಕೊಂಬು ಗ್ರಾಮದ ಹಮೀದ್ ಮನೆಪಕ್ಕ ಗುಡ್ಡ ಕುಸಿದರೆ, ಸಜಿಪಪಡು ಗ್ರಾಮದ ಸೋಮನಾಥ್ ಮೂಲ್ಯ ಅವರ ಭತ್ತದ ಗದ್ದೆಗೆ ನೀರು ನುಗ್ಗಿ ಹಾನಿಯಾಗಿದೆ. ವಿಟ್ಲ ಕಸಬ ಗ್ರಾಮದ ಸೇರಾಜೆ ಎಂಬಲ್ಲಿ ಮನೆಗೆ ಹಾನಿಯಾಗಿದ್ದರೆ, ಸಜಿಪಮುನ್ನೂರು ಗ್ರಾಮದ ನಂದಾವರದ ಮಹಮ್ಮದ್ ಆರಿಫ್ ಎಂಬವರ ಮನೆಗೆ ಹಾನಿಯಾಗಿದೆ. ಒಟ್ಟು 3 ಮನೆಗಳಿಗೆ ಹಾನಿಯಾಗಿದ್ದರೆ, 0.25 ಹೆಕ್ಟೇರ್ ಅಡಕೆ ತೋಟ ಮತ್ತು 0.25 ಹೆಕ್ಟೇರ್ ಭತ್ತದ ಕೃಷಿಗೆ ಹಾನಿ ಸಂಭವಿಸಿದೆ ಎಂದು ಕಂದಾಯ ಇಲಾಖೆ ಕಚೇರಿ ಮಾಹಿತಿ ತಿಳಿಸಿದೆ. ಬಿಸಿರೋಡು ಕೋಣಾಜೆ ರಾಜ್ಯ ಹೆದ್ದಾರಿಯ ಮೆಲ್ಕಾರ್ ನಲ್ಲಿ ಮೆಸ್ಕಾಂ ಇಲಾಖೆಗೆ ಸೇರಿದ ನಾಲ್ಕು ವಿದ್ಯುತ್ ಕಂಬಗಳು ನೆಲಕ್ಕುರುಳಿವೆ, ನಾಲ್ಕು ವಿದ್ಯುತ್ ಕಂಬಗಳು ಬೀಳುವ ಹಂತದಲ್ಲಿ ವಾಲಿ ನಿಂತಿದ್ದು ತಂತಿಗಳು ಕಡಿದು ಬಿದ್ದ ಘಟನೆ ಗುರುವಾರ ಮಧ್ಯರಾತ್ರಿ ವೇಳೆ ಸಂಭವಿಸಿದೆ. ಬಳಿಕ ಈ ಭಾಗದ ಒಟ್ಟು ಆರು ಟ್ರಾನ್ಸ್ ಫಾರ್ಮರ್ ಗಳ ವಿದ್ಯುತ್ ಸಂಪರ್ಕ ಕಡಿತಮಾಡಲಾಗಿಯಿತು.