ಬಂಟ್ವಾಳ ಮಿನಿ ವಿಧಾನಸೌಧದ ಎದುರು ಇರುವ ವಿಜಯಲಕ್ಷ್ಮೀ ಸ್ಟೀಲ್ ಹೌಸ್ ನ ವಿಜಯಲಕ್ಷ್ಮೀ (ಗಜಲಕ್ಷ್ಮೀ) ಕ್ರೇನ್ ನಲ್ಲಿ 49 ಮೀಟರ್ ಎತ್ತರದಲ್ಲಿ ತಿರಂಗಾವನ್ನು ಹಾರಿಸಿದ್ದು ಎಲ್ಲರ ಗಮನ ಸೆಳೆಯಿತು. ಸ್ವಾತಂತ್ರ್ಯ ಉತ್ಸವದ ದಿನವಾದ ಶನಿವಾರ, ಎಲ್ಲೆಡೆ ಸಂಭ್ರಮೋಲ್ಲಾಸಗಳೊಂದಿಗೆ ಕಾರ್ಯಕ್ರಮಗಳನ್ನು ಆಚರಿಸುವ ಹೊತ್ತಿನಲ್ಲಿ ವಿಜಯಲಕ್ಷ್ಮೀ ಸ್ಟೀಲ್ ಹೌಸ್ ನ ಮಾಲೀಕರು ಮತ್ತು ಸಿಬ್ಬಂದಿ, ಕ್ರೇನ್ ನಲ್ಲಿ ಬಾವುಟ ಹಾರಿಸುವ ಮೂಲಕ ರಾಷ್ಟ್ರಭಕ್ತಿ ಮೆರೆದರು. ಬೆಳಗ್ಗಿನಿಂದ ಸಂಜೆವರೆಗೆ ಬಿ.ಸಿ.ರೋಡಿನಲ್ಲಿ ಅತಿ ಎತ್ತರದಲ್ಲಿ ಹಾರಾಡಿದ ಈ ತಿರಂಗಾ ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಚಾರ ಪಡೆಯಿತು.