ಬಂಟ್ವಾಳ ತಾಲೂಕಿನ ಮತ್ತೋರ್ವ ಮಹಿಳೆ ಕೋವಿಡ್ ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆಗಿದ್ದಾರೆ. ನರಿಕೊಂಬು ಗ್ರಾಮದ ನಾಯಿಲ ನಿವಾಸಿ 47 ವರ್ಷದ ಮಹಿಳೆ ಕಳೆದ ಏಪ್ರಿಲ್ 26ರಂದು ಕೊರೊನಾ ಸೋಂಕು ದೃಢಪಟ್ಟು ಮಂಗಳೂರಿನ ವೆನ್ಲಾಕ್ ಆಸ್ಪತ್ರೆಗೆ ದಾಖಲಾಗಿದ್ದರು. ಇದೀಗ ಅವರು ಗುಣಮುಖರಾಗಿದ್ದು ಡಿಸ್ಚಾರ್ಜ್ ಆಗಿದ್ದಾರೆ ಎಂದು ಜಿಲ್ಲಾಧಿಕಾರಿ ಸಿಂಧೂ ರೂಪೇಶ್ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಬಂಟ್ವಾಳ ಕಸ್ಬಾ ಗ್ರಾಮಕ್ಕೊಳಪಡುವ ಬಂಟ್ವಾಳ ಪೇಟೆ ನಿವಾಸಿ 33 ವರ್ಷದ ಮಹಿಳೆ ಗುಣಮುಖರಾಗಿದ್ದು, ಇದೀಗ ನರಿಕೊಂಬಿನ ಮಹಿಳೆಯೂ ಗುಣಮುಖರಾದಂತಾಗಿದೆ.
ಬಂಟ್ವಾಳ ತಾಲೂಕಿನಲ್ಲಿ ಗುಣಮುಖರಾದವರ ಸಂಖ್ಯೆ ಒಟ್ಟು 4. ಮೃತಪಟ್ಟವರು 3. ಸೋಂಕಿತರು 5. ತಾಲೂಕಿನಲ್ಲಿ ಒಟ್ಟು 12 ಮಂದಿಗೆ ಕೊರೊನಾ ಸೋಂಕು ದೃಢಪಟ್ಟಿತ್ತು. ಇವರ ಪೈಕಿ ಸಜೀಪನಡು ಗ್ರಾಮದ 1, ತುಂಬೆ 1, ಬಂಟ್ವಾಳ ಪೇಟೆಯ 9 ಮತ್ತು ನರಿಕೊಂಬು ಗ್ರಾಮದ 1 ಸೇರಿದ್ದರು. ಇವರ ಪೈಕಿ ಸಜೀಪನಡು, ತುಂಬೆ, ನರಿಕೊಂಬು ಗ್ರಾಮದ ಎಲ್ಲರೂ ಗುಣಮುಖರಾದಂತಾಗಿದೆ. ಬಂಟ್ವಾಳ ಪೇಟೆಯ 9 ಮಂದಿಯಲ್ಲಿ 3 ಮಂದಿ ಸಾವನ್ನಪ್ಪಿದ್ದಾರೆ. ಒಬ್ಬರು ಗುಣಮುಖರಾಗಿದ್ದಾರೆ. 5 ಮಂದಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.