ಸರಕಾರಿ ಶಾಲೆ ಉಳಿಸಿ ತಂಡದಿಂದ ಚಿಕ್ಕಬಳ್ಳಾಪುರ ಭೇಟಿ

ಸುದ್ದಿ, ಲೇಖನಗಳಿಗೆ www.bantwalnews.com – ಸಂಪಾದಕ: ಹರೀಶ ಮಾಂಬಾಡಿ

ಬಂಟ್ವಾಳ: ಪ್ರಕಾಶ್ ಅಂಚನ್ ನೇತೃತ್ವದ ಸರಕಾರಿ ಶಾಲೆ ಉಳಿಸಿ ಬೆಳೆಸಿ ರಾಜ್ಯ ಸಮಿತಿಯ ತಂಡ ಸರಕಾರಿ ಶಾಲೆಯಲ್ಲಿ  ಮಕ್ಕಳ ಸಂಖ್ಯೆಯನ್ನು ಹೆಚ್ಚಿಸಿ ಶಾಲೆಗಳನ್ನು ಉಳಿಸಿ ಬೆಳೆಸುವ ನಿಟ್ಟಿನಲ್ಲಿ  ಚಿಕ್ಕಬಳ್ಳಾಪುರ ಜಿಲ್ಲೆಗೆ ಪ್ರವಾಸ ಕೈಗೊಂಡಿದ್ದು  ಗೌರಿಬದನೂರಿನಲ್ಲಿ ಗ್ರಾಮವಾಸ್ತವ್ಯ ಹೂಡಿದೆ. ಗುರುವಾರ ಮುಂಜಾನೆ ಬಂಟ್ವಾಳದಿಂದ ಹೊರಟಿರುವ ತಂಡ ಗೌರಿಬಿದನೂರಿನ ನೇತಾಜಿ ಫೌಂಡೇಶನ್ ಸದಸ್ಯರ  ಜೊತೆಗೂಡಿ ಸಂಜೆಯ ವೇಳೆ ವಿದ್ಯುತ್ ಕಾಲೋನಿಯ  ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯನ್ನು ಸಂದರ್ಶಿಸಿದೆ. ಬಳಿಕ ಜರಬಂಡಹಳ್ಳಿ ಗ್ರಾಮದಲ್ಲಿ ಮನೆ ಭೇಟಿ ಮಾಡಿ ಶಾಲೆ ಉಳಿಸುವ ಬಗ್ಗೆ ಗ್ರಾಮಸ್ಥರೊಂದಿಗೆ ಚರ್ಚೆ ನಡೆಸಿದೆ. ಸ್ಥಳೀಯ ಗ್ರಾಮಪಂಚಾಯತ್, ತಾಲೂಕು ಪಂಚಾಯತ್, ಜಿಲ್ಲಾ ಪಂಚಾಯತ್ ಸದಸ್ಯು ಹಾಗೂ ಸ್ಥಳೀಯ ಯುವಕ ಸಂಘದ ಜೊತೆ ಈ ಬಗ್ಗೆ ಮಾತುಕತೆ ನಡೆಸಿತು. ಈ ಸಂದರ್ಭ ಸರಕಾರಿ ಶಾಲೆ ಉಳಿಸಿ ಬೆಳೆಸಿ ಸಮಿತಿಯ ರಾಜ್ಯಾಧ್ಯಕ್ಷ ಪ್ರಕಾಶ್ ಅಂಚನ್, ಸದಸ್ಯರಾದ ಪುರುಷೋತ್ತಮ ಅಂಚನ್, ರಾಮಚಂದ್ರ ಪೂಜಾರಿ, ನವೀನ್ ಸೇಸಗುರಿ, ದೀಪಕ್ ಸಾಲ್ಯಾನ್, ಅಶೋಕ್ ಗೌರಿಬಿದನೂರು ಹಾಜರಿದ್ದರು.