ಶಾರದಾ ಜಿ.ಬಂಗೇರ
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಕೊರ್‍ಪಿನ “ಚಾವಡಿ ತಮ್ಮನ” ಮಾನಾದಿಗೆಗ್ ಬಂಟ್ವಾಳ ತಾಲೂಕುದ ಮಣಿನಾಲ್ಕೂರು ಗ್ರಾಮದ ಉಜಿರಂಡಿಪಲ್ಕೆ ನಿವಾಸಿ, ಹಿರಿಯ ಜಾನಪದ ಕಲಾವಿದೆ ಶಾರದಾ ಜಿ.ಬಂಗೇರ ಆಯ್ಕೆಯಾತೆರ್ ಪಂದ್ ಅಕಾಡೆಮಿದ ರಿಜಿಸ್ಟಾರ್ ಚಂದ್ರಹಾಸ ರೈ ಬಿ. ಬೊಕ್ಕ ಲೇಸ್‌ದ ಸದಸ್ಯ ಸಂಚಾಲಕೆರಾಯಿನ ಎ.ಗೋಪಾಲ ಅಂಚನ್ ತೆರಿಪಾದೆರ್. ಕುಡ್ಲದ ಅಕಾಡೆಮಿದ “ಸಿರಿಚಾವಡಿ”ಡ್ ನವಂಬರ್ 17 ನೇ ತಾರೀಖ್‌ಗ್ ಮಧ್ಯಾಹ್ನ ೩ಗಂಟೆಗ್ ಅಕಾಡೆಮಿದ ಗುರ್‍ಕಾರ್ ಎ.ಸಿ.ಭಂಡಾರಿಲೆನ ಗುರ್‍ಕಾರ್‍ಮೆಡ್ ಚಾವಡಿ ತಮ್ಮನ ನಡಪುಂಡು. ಮಂಗಳೂರು ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತ್‌ದ ಗುರ್‍ಕಾರ್‍ದಿ ವಿಜಯಲಕ್ಷ್ಮೀ ಬಿ.ಶೆಟ್ಟಿ ತಮ್ಮನ ಮಲ್ಪುವೆರ್. ಬಿ.ಮೂಡ ಪಡವಿಪೂರ್ವ ಕಾಲೇಜಿದ ಉಪನ್ಯಾಸಕೆರಾಯಿನ ಅಬ್ದುಲ್ ರಝಾಕ್ ಅನಂತಾಡಿ ಅಭಿನಂದನಾ ನುಡಿ ಕೊರ್‍ಪೆರ್.
೧೯೫೨ನೇ ಇಸವಿಡ್ ಬಂಟ್ವಾಳ ತಾಲೂಕುದ ದೇವಸ್ಯಪಡೂರು ಗ್ರಾಮೊದ ಮರಾಯಿದೊಟ್ಟು ಅಂತರ ಪನ್ಪಿ ಇಲ್ಲಲ್ ಚೆನ್ನಪ್ಪ ಮೂಲ್ಯ ಬೊಕ್ಕ ಸಂಕಮ್ಮ ದಂಪತಿಲೆನ ನಾಲನೇ ಮಗಳಾದ್ ಪುಟ್ಟಿನ ಸುಂದರಿ ಯಾನೆ ಶಾರದಾ ಬಂಗೇರ, ಕಿನ್ಯ ಪ್ರಾಯೊಡೇ ಪೆರಿಯಾಕ್ಲು ಕಂಡೊಡು ಪನೊಂದಿತ್ತಿನ ಪಾಡ್ದನಲೆನ್ ಕೇನೊಂದು ಬುಲೆಯಿನಾರ್. ಎಲ್ಲಿಡೆ ಕೈತಲ್ದ ಇಲ್ಲದ ಲಿಂಗು ಅಜ್ಜಿಡ ಕತೆ, ಕಬಿತೆ, ಪಾರ್‍ದನಲೆನ್ ಕೇನೊಂದು/ಕಲ್ತೊಂದು ಪತ್ತ್ ವರ್ಷ ಪ್ರಾಯದಪಗನೇ ಕಂಡೊದ ಬೇಲೆಗ್ ಪೋವೊಂದು ಅಲ್ಪ ಓ ಬೇಲೆ, ದಿಮಿಸಾಲೆ, ಆಮೈಲೆ, ಈಜೋ ಮಂಜೊಟ್ಟಿ ಗೋಣ ಇಂಚಿತ್ತಿ ಕಬಿತೆಲು ಬೊಕ್ಕ ಬೇತೆ ಬೇತೆ ಪಾಡ್ದನಲೆನ್ ಪನಿಯೆರೆ ಸುರು ಮಲ್ತಿನಾರ್. ಜಾನಕಿ ಅಜ್ಜಿ ಪನ್ಪುನಾರೆನೊಟ್ಟುಗು ಕತೆ ಕಬಿತೆನ್ ಪಂಡೊಂದು ಬೇತೆ ಇಲ್ಲದ ಕಂಡದ ಬೇಲೆಗ್ ಪೋವೊಂದು ತನ್ನ ಕಬಿತೆ, ಪಾಡ್ದನಲೆನ್ ಅವುಲು ಪನೊಂದು ಕಂಡದ ಕಲೊಕ್ಕು ಪೊಸ ರಂಗ್ ಕೊರಿನಾರ್.
೧೯೯೦ಡ್ ಗಂಗಯ್ಯ ಮೂಲ್ಯ ಪನ್ಪುನಾರೆನೊಟ್ಟಿಗೆ ಮದಿಮೆ ಆದ್ ಬಂಟ್ವಾಳ ತಾಲೂಕುದ ಮಣಿನಾಲ್ಕೂರು ಗ್ರಾಮದ ಉಜಿರಂಡಿಪಲ್ಕೆ ಪನ್ಪಿ ಇಲ್ಲಲ್ ಜೀವನ ಕರಿತ್ತೊಂದು ಬತ್ತಿನ ಶಾರದಾ ಜಿ.ಬಂಗೇರ, ತನ್ನ ಜಾನಪದ ಕಲೆಕ್ಲೆನ್ ದುಂಬರಿಸವೊಂದು ಪೊಪಿನೆತ್ತ ಒಟ್ಟಿಗೆ ಊರುದ ಆರೋಗ್ಯ ಕಾರ್‍ಯಕರ್ತೆರಾಯಿನ ಸೀತಮ್ಮ ಬೊಕ್ಕ ಚಂದ್ರಮ್ಮನಕ್ಲೆನೊಟ್ಟಿಗೆ ಸೇರೊಂದು ಸಾಮಾಜಿಕ, ಸಹಕಾರಿ, ಶೈಕ್ಷಣಿಕ ಸೇವೆಡ್ಲ ಬೆನ್ನಿ ಬೆನಿಯರೆ ಸುರುಮಲ್ತೆರ್. ಸಾಕ್ಷರತಾ ಅಂದೋಲನದ ಸ್ವಯಂಸೇವಕಿಯಾದ್, ೨೨ ವರ್‍ಸ ಅಂಗನವಾಡಿ ಸಹಾಯಕಿಯಾದ್, ಪ್ರತಿಭಾ ಮಹಿಳಾ ಮಂಡಲ, ಕೃಷಿಕರ ವೇದಿಕೆ, ಪರಿಸರಾಸಕ್ತರ ಒಕ್ಕೂಟ, ಯುವಜನ ಒಕ್ಕೂಟ, ಮಹಿಳಾ ಮಂಡಳಿಲೆನ ಒಕ್ಕೂಟ, ಮಣಿನಾಲ್ಕೂರು ಶಾಲಾಭಿವೃದ್ಧಿ ಸಮಿತಿ, ಗುರುವಾಯನಕರೆ ನಾಗರಿಕ ಸೇವಾ ಟ್ರಸ್ಟ್, ಸ್ತ್ರೀಶಕ್ತಿ ಸಂಘಟನೆ, ಮಹಿಳಾ ಸಹಕಾರಿ ಸಂಘ, ತುಳುಕೂಟ ಬಂಟ್ವಾಳ ಇಂಚಿತ್ತಿನ ಬೇತೆ ಕೂಟಲೆಡ್ ಜಬಾದಾರಿಕೆನ್ ದೆತೊಂದು ಅವ್ವೋತೋ ಲೇಸ್‌ಲೆನ ಎಡ್ಡೆಪ್ಪುಗು ಪೊನೆಯಿನಾರ್.
ಶಾಲಾ ಕಾಲೇಜಿಲೆಡ್, ಬೇತೆ ಬೇತೆ ಸಂಘಸಂಸ್ಥೆಲೆಡ್ ಸಂದಿ, ಪಾರ್‍ದನ, ಓಬೇಲೆ, ಉರಲ್ ಇಂಚಿತ್ತಿನ ಜಾನಪದ ಪದೊಕ್ಲೆನ್ ಕಲ್ಪಾವೊಂದು ಅವೆತ್ತ ಅಭಿರುಚಿ ಪುಟ್ಟಾವೊಂದು ತುಳು ಜಾನಪದ ಮೌಖಿಕ ಸಾಹಿತ್ಯದ ಒರಿಪು ಬುಲೆಪುಗಾದ್ ಇನಿಕ್ಲಾ ಮಾಮಲ್ಲ ಸೇವೆನ್ ಸಂದಾಯಿತ ಮಲ್ತೊಂದುಪ್ಪುನ ಶ್ರೀಮತಿ ಶಾರದಾ .ಜಿ.ಬಂಗೇರ ಪರಿಸರ ಸಮ್ಮೇಳನ, ತುಳು ಒಕ್ಕೂಟದ ಲೇಸ್, ಮಂಗಳೂರು ಆಕಾಶವಾಣಿ, ಸಾರಂಗ ರೇಡಿಯೋ, ನಮ್ಮ ಟಿ.ವಿ, ಬೆಳ್ತಂಗಡಿ ವಕೀಲರ ಸಾಹಿತ್ಯ ಕಮ್ಮಟ, ಉಜಿರೆ ವಿಶ್ವ ತುಳು ಸಮ್ಮೇಳನದ ಲೇಸ್, ಬಂಟ್ವಾಳ ತುಳು ಸಾಹಿತ್ಯ ಸಮ್ಮೇಳನ, ಮೂಡುಬಿದಿರೆ ಆಳ್ವಾಸ್ ನುಡಿಸಿರಿ, ಬಳ್ಲಾರಿಡ್ ನಡತಿನ ಅಂಗನವಾಡಿ ಕಾರ್‍ಯಕರ್ತೆರೆನ ಸಮಾವೇಷ ಇಂಚ ತಾಲೂಕು, ಜಿಲ್ಲೆ, ರಾಜ್ಯಮಟ್ಟೊದ ಅವೇತೋ ಲೇಸ್‌ಡ್ ತನ್ನ ಜಾನಪದ ಪದೊಕ್ಲೆನ್ ಪಂದ್ ಜನಮಂದೆಲೆನ ಬಾಯಿರ್‍ದ್ ಪುಗಾರ್‍ತೆದ ಪಾತೆರ ಕೇಂಡಿನಾರ್. ಕರ್ತವ್ಯಡ್ ದಕ್ಷತೆ, ವ್ಯಕ್ತಿತ್ವಡ್ ಬದ್ಧತೆ, ಸೇವೆಡ್ ಪ್ರಾಮಾಣಿಕತೆನ್ ದಿಂಜಾವೊಂದು ಸರಳ ಸಜ್ಜನಿಕೆದ ಸ್ನೇಹಜೀವಿಯಾದ್ ಮಾತೆರೆನ ಒಟ್ಟಿಗೆ ಒಂಜಾದ್ ಬೆರೆಪುನ, ತುಳು ಸಂಸ್ಕೃತಿದ ಒರಿಪುಗು ಪೊನೆಪುನ ಮಾವಲ್ಲ ಮನಸ್ಸ್‌ದ ಶಾರದಾ ಜಿ.ಬಂಗೇರ ಸಾಹಿತ್ಯ ಬೊಕ್ಕ ಸಂಘಟನಾ ರಂಗೊದ ಸಾಧನೆಗಾದ್ ಕನ್ನಡ ಸಾಹಿತ್ಯ ಪರಿಷತ್ತು, ತುಳು ಒಕ್ಕೂಟ ಇಂಚಿತ್ತಿ ಬೇತೆ ಕೂಟಲೆಡ್ದ್ ತಮ್ಮನ ಬಲ್ಮನ ಪಡೆಯಿನಾರ್. ನನಲಾತ್ ಕಾಲ ಇಂಬೆರೆನ ಸೇವೆ ಮುಂದುವರಿಯಡ್, ತುಳುನಾಡ್ದ ದೈವದೇವೆರೆನ ಅನುಗ್ರಹ ಇಂಬೆರೆನ ಪಾಲ್‌ಗುಪ್ಪಡ್.