ಬಿ.ಸಿ.ರೋಡ್ ಕೆ.ಎಸ್.ಆರ್.ಟಿ.ಸಿ. ಬಸ್ ನಿಲ್ದಾಣದ ಎದುರು ಅಜ್ಜಿಬೆಟ್ಟು ಕಡೆಗೆ ತಿರುಗುವ ಜಾಗದಲ್ಲಿ ಸರಕಾರಿ ಬಸ್ ಮತ್ತು ಹೊಂಡಾ ಆಕ್ಟಿವಾ ಸ್ಕೂಟರ್ ನಡುವೆ ಡಿಕ್ಕಿ ಸಂಭವಿಸಿದೆ. ಗುರುವಾರ ಸಂಜೆ ಈ ಘಟನೆ ನಡೆದಿದ್ದು, ಸವಾರ ಗಾಯಗೊಂಡಿದ್ದಾರೆ ಎಂಬ ಪ್ರಾಥಮಿಕ ಮಾಹಿತಿ ಲಭಿಸಿದೆ.
ಈ ಜಾಗ ತೀರಾ ಅಪಾಯಕಾರಿಯಾಗಿದ್ದು, ವಾಹನಗಳನ್ನು ತಿರುಗಿಸುವ ವೇಳೆ ಎಡಬಲಗಳನ್ನು ನೋಡದೇ ಇದ್ದರೆ ಅಪಘಾತ ಖಚಿತ ಎನ್ನುವಂತಿದೆ. ಆದರೆ ಸಂಚಯಗಿರಿ- ಅಜ್ಜಿಬೆಟ್ಟು ಕಡೆಗೆ ಹೋಗುವವರಿಗೆ ಈ ತಿರುವು ಅಗತ್ಯವಾಗಿದ್ದು, ಈ ಜಾಗದಲ್ಲಿ ಪೊಲೀಸರು ಟ್ರಾಫಿಕ್ ಕಂಟ್ರೋಲ್ ಮಾಡುವುದು ಪ್ರತಿ ಕ್ಷಣವೂ ಅಗತ್ಯವಿದೆ. ಪೀಕ್ ಅವರ್ ಗಳಲ್ಲಿ ವಾಹನ ದಟ್ಟಣೆ ಜಾಸ್ತಿ ಇರುವ ಕಾರಣ ವಾಹನ ಸವಾರರೂ ಇಲ್ಲಿ ವೇಗವನ್ನು ನಿಯಂತ್ರಿಸುವ ಅಗತ್ಯವಿದೆ ಎಂದು ಸಾರ್ವಜನಿಕರು ಅಭಿಪ್ರಾಯಪಟ್ಟಿದ್ದಾರೆ.