ಸೀಮೆಎಣ್ಣೆ ಸೇವಿಸಿ ಬಾಲಕಿ ಸಾವು

ಬಾಟಲಿಯೊಳಗಿದ್ದ ಸೀಮೆ ಎಣ್ಣೆಯನ್ನು ಆಕಸ್ಮಿಕವಾಗಿ ಕುಡಿದ ಒಂದು ವರ್ಷದ ಬಾಲಕಿ ಚಿಕಿತ್ಸೆ ಫಲಕಾರಿಯಾಗದೆ ಸಾವನ್ನಪ್ಪಿದ್ದಾಳೆ.

ಬಂಟ್ವಾಳ ತಾಲೂಕಿನ ಸಜೀಪಮೂಡ ಗ್ರಾಮ ಸುಭಾಷ್ ನಗರದಲ್ಲಿರುವ ಜಲೀಲ್ ಎಂಬವರ ಪುತ್ರಿ ಆಯಿಷಾ ಜಯಿಷಾ (1.2 ವರ್ಷ) ಮೃತಪಟ್ಟ ಮಗು.

ಮೂರು ದಿನಗಳ ಹಿಂದೆ ಸಂಜೆಯ ವೇಳೆ ಜಲೀಲ್ ಅವರು ಕಾರಿನಲ್ಲಿ ಡಾಂಬರು ಅಂಟಿಕೊಂಡದ್ದನ್ನು ತೆಗೆಯುವ ಸಲುವಾಗಿ ಸೀಮೆ ಎಣ್ಣೆಯನ್ನು ತರಿಸಿ, ಕೆಲಸವಾದ ಬಳಿಕ ಉಳಿದ ಸೀಮೆ ಎಣ್ಣೆಯನ್ನು ಮನೆಯೊಳಗಿಟ್ಟಿದ್ದರು. ಬಾಟಲಿಯೊಂದರಲ್ಲಿಟ್ಟಿದ್ದ ಆ ಸೀಮೆ ಎಣ್ಣೆಯನ್ನು ಮಗು ಅಚಾನಕ್ ಆಗಿ ಬಾಯಿಗೆ ಎರೆದುಕೊಂಡು ಕುಡಿದಿದೆ. ಕೂಡಲೇ ಮನೆಯವರಿಗೆ ವಿಷಯ ಗೊತ್ತಾಗಿ ಆಕೆಯನ್ನು ಮಂಗಳೂರಿನ ಖಾಸಗಿ ಆಸ್ಪತ್ರೆಗೆ ದಾಖಲು ಮಾಡಲಾಯಿತು. ಆದರೆ ಮಂಗವಾರ ಬೆಳಗ್ಗೆ ಮಗು ಅಸು ನೀಗಿತು ಎಂದು ಬಂಟ್ವಾಳ ಪೊಲೀಸರು ತಿಳಿಸಿದ್ದಾರೆ. ಬಂಟ್ವಾಳ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.